ސުޕްރީމްކޯޓުގެ މެންޑާމަސްއަކީ ހައްޤަށް ލިބުނު ފުރިހަމަ ކާމިޔާބީއެއް

ކަށިން ވަރުނެރުއްވައިގެން  ބޯޑަރ ކޮންޓްރޯލު ބީއޯޓީ ޕްރޮޖެކްޓް ގާއިމު ކުރިއަ ނުދެއްވަން ހިއްޕަވާ އޭސީސީގެ ޓީމު

އަދްލު އިންސާފު ޤާއިމްކުރުމުގެ އެންމެ މަތީ ބާރުކަމުގައިވާ ސުޕްރީމްކޯޓުގެ ފަރާތުން، ޖޫން 25 ވަނަ ދުވަހު ނެރެފައިވާ މެންޑާމަސްއަކީ ޝަރުއީ ދާއިރާގެ މިނިވަންކަމާއި މުސްތަޤިއްލުކަމާމެދު ހިތު ތެރޭގައި އުފެދިފައިވާ ޝައްކާއި ވަހުމްތަކަށް ލިބުނު ޔަޤީންކަމެކެވެ. ދިވެހިރާއްޖޭގެ ޝަރުއީ ދާއިރާގައި ހުރި މައްސަލަތަކުގެ ވާހަކައަކީ ވަކި ޕާޓީއަކުން ނުވަތަ ވަކި ޖަމާއަތަކުން ދައްކާ ވާހަކަތަކެއްނޫނެވެ. އެވާހަކަތަކަކީ އަޑުހަރުކޮށް ނުދެއްކިކަމުގައި ވިޔަސް، އެތައް ބައެއްގެ ހިތުގައި ނުތަނަވަސްކަމާއި މާޔޫސްކަން އުފެދިފައިވާ ޤައުމީ ބޮޑު މައްސަލައެކެވެ.

ރައީސް ޑރ.ވަހީދުގެ ސަރުކާރަށް ކުރިމަތިވި އެންމެ ބޮޑު އެއް ގޮންޖެހުމަކަށް ވެގެން ދިޔަ މައްސަލައަކީ ޑރ. ވަހީދު ސަރުކާރުގައި ހިމެނޭ ކޯލިންޝަން ޕާޓުނަރުން އަޑިގައިތިބެގެން ކުރިމަތިކުރުވި އިމިގްރޭޝަން ގެ ބޯޑަރ ކޮންޓްރޯލް ސިސްޓަމް ޤާއިމްކުރުމުގެ މައްސަލަކަމުގައި ދެންނެވިދާނެއެވެ. މިމައްސަލައަށް މިވަރުގެ ބޮޑު ސަމާލުކަމެއް ލިބިގެން ދިޔަ އެންމެ ބޮޑު އެއް ސަބަބަކީ މިމައްސަލާގެ ތުޙުމަތުގެ އިނގިލި ދިއްކުރެވުނު ފަރާތަކީ ޑރ.ވަހީދުގެ އަނބިކަނބަލުން ގެ ކޮއްކޮ އައްޝައިޚް އިލިޔާސް ހުސެއިން އިބްރާހިމް ކަމަށްވީތީއެވެ.

މުހައްމަދު ނަޝީދުގެ ސަރުކާރުގެ ދުވަސްވަރު އިއުލާނު ކުރެވި އިންޓަރނޭޝަނަލް ބިޑަށް ހުޅުވާލައި ޓެންޑަރ އަދި އެވެލުއޭޝަން ސީދާ ފައިނޭންސް މިނިސްޓްރީންކޮށް އަދި އެމިނިސްޓްރީން އެވާޑްކުރި މި މުޙިއްމު މަޝްރޫއު ކުރިއަށް ގެންދިޔުމުގައި އެންމެ ފުރަތަމަ އިލިޔާސްއަށް ފިއްތުންތައް ކުރިމަތިވީ އެ ސަރުކާރުންނެވެ. އެންމެފަހުން އެސަރުކާރުން އިލިޔާސް އެހެން މުއައްސަސާއަކަށް ބަދަލުކޮށް، މަޝްރޫއުގެ ކަންތައްތައް ބަދަލުކޮށްލުމަށް ހީލަތްތެރި މަސައްކަތްތަކެއް އޭރުވެސް އެބޭފުޅުންކޮޅު އަޑީ ތިއްބަވައިގެން ހިންގިއެވެ.

ޤައުމީ ބޮޑު މަޝްރޫއުއެއް ހީލަތްތެރިކަމާއެކު ބަދަލުކޮށްލުމަށް ނަޝީދުގެ ސަރުކާރުގެ އިސް ބަޔަކާއިވެސް ގުޅިގެން ހިންގި އަމަލު، އޭގެ ކާމިޔާބީއަށް ވާޞިލުވުމުގެ ކުރީން، ސަރުކާރު ބަދަލުވެ، ޑރ.ވަހީދު ރައީސުލްޖުމްހޫރިއްޔާގެ މަޤާމަށް އިސްވިއެވެ.

ޑރ.ވަހީދުގެ ސަރުކާރުގެ ތެރެއިންވެސް މި މަޝްރޫއުއަށް ފިއްތުންތައް ކުރިމަތިކޮށް، ހުރަސްތައް އަޅާނެ ބަޔަކު ފާޅުވެ، އެފަރާތްތަކުގެ މަސައްކަތްތައް ފަށައިގަތެވެ. ނަޝީދުގެ ސަރުކާރާއި ޚިލާފަށް، މިފަހަރު މި މަޝްރޫއުއަށް ހުރަސްއެޅުމުގައި ޝާމިލްކުރީ ޤާނޫނު ތަންފީޒުކުރުމުގެ ބާރާއި އަދްލު އިންސާފު ޤާއިމް ކުރުމުގެ ބާރެވެ.

އެންޓިކޮރަޕްޝަން ކޮމިޝަނުން ފުލުހުންގެ މުއައްސަސާ ބޭނުންކޮށް ކޯޓު އަމުރެއް ހޯދައިގެން، އިމިގްރޭޝަން ޑިޕާޓްމަންޓް ގެ މުވައްޒަފުންނަށް ނަފްސާނީ ގޮތުން ބިރުދައްކާ އަދި މީޑިޔާގެ ޒަރިއްޔާއިން މުޅި ޤައުމަށް އެފަރާތްތައް ފަޟީހަތްކޮށްލުމަށް ހިންގި ނާތަހުޒީބު އަމަލަކީ މިފަދަ ޑިމޮކްރެޓިކް ވެރިކަމެއްގެ ތެރެއިން ހުވަފެނުންވެސް ދެކެފައިނެތް ފަދަ ދަށު ދަރަޖައިގެ އަމަލެކެވެ.

މިހުރިހާ ހަރުފަތްތަކެއްގައިވެސް ނުހަނު ޘާބިތުކަމާއެކު، އެންމެ ފުރަތަމަ ދުވަހުން ފެށިގެން މިއަދާހަމައަށްވެސް ޝެއިޚް އިލިޔާސް ހުންނެވިއެވެ. މި މުޅި މަޝްރޫއު ކުރިއަށް ގެންގޮސްފައިވާ ހާމަކަންބޮޑު ގޮތާއި އަދި މި މަޝްރޫއުގައި ފަސާދައިގެ ޒައްރެއްގެ މިންވަރުވެސް ނޯންނާނެކަމުގެ ފުރިހަމަ ޔަޤީންކަމުގައި އެބޭފުޅާ ޘާބިތުވެ ހުންނެވިއެވެ.

ހަފަރާތުން އުޑުމަތި ބަނަކުރަމުން ގެންގޮސް، އެންމެ ފަހުން އިމިގްރޭޝަން ޑިޕާޓްމަންޓުން އެހެން ވުޒާރާއަކަށް ޝެއިޚް އިލިޔާސް ބަދަލު ކުރެއްވިއިރުވެސް، އެބޭފުޅާ ހުންނެވީ މި ބޮޑު ޤައުމީ މަޝްރޫއުގައި ޘާބިތުވެވަޑައިގެންނެވެ. ސަރުކާރާއި އެއްކޮޅު އަދި ސަރުކާރާއި ދެކޮޅު މިޑިޔާގައި ޝެއިޚް އިލިޔާސް އާއި އަދި މި މަޝްރޫއުއާ އެއްވެސް ގުޅުމެއް ނެތް އެތައް ބަޔަކު ކަތިލަމުން ގެންދިޔައިރު، ފަރުދާގެ ފުރަގަހުގައި މި މުޅި އެޕިސޯޑު ރާވަމުން ގެންދިޔަ ޑައިރެކްޓަރުންގެ ޓީމެއް ދިޔައީ ހަރަކާތްތެރިވަމުންނެވެ.

އެހެނަސް މަކަރުވެރިން ސިއްރުން ރާވާ ރޭވުންތައް އެންމެ މޮޅަށް އައްސަވާ ބައްލަވާ ވޮޑިގެންވާ ކަލަކު ވާކަމެއް އެބައިމީހުން ނުދަތެވެ. އަބުރުވެރި ބައެއްގެ އަބުރު ނަގާ ވެއްޔާމޮޑެލުމަށް އެބަޔަކު ތިބީ ކެތްމަދުވެ، އަތުކުރި އޮޅާލާފައެވެ.

ޤާނޫނީ އިލްމުން ކިތަންމެ މައްޗަށް ކިޔަވައިގެން ތިބި ބަޔަކު ވިޔަސް، ޤާނޫނާއި ޚިލާފު އަމަލެއް ހިންގުމުން އެކަން ދެކޭނެ ބަޔަކުވެސް ތިބޭނެއެވެ.

އާދެ، ސުޕްރީމް ކޯޓުން ޖޫން 25 ވަނަ ދުވަހު ނެރުނު މެންޑާމަސްއަކީ މިދެންނެވި ވާހަކަތަކުގެ ފުރިހަމަ ދަލީލެކެވެ.

ބޯޑަރ ކޮންޓްރޯލް ސިސްޓަމް ޤާއިމްކުރުމުގެ މައްސަލާގައި ޝަރުއީކޯޓު މަރުހަލާތަކަށް ‘ނުފޫޒު ގަދަ ބަޔަކު’ ބާރު ފޯރުވައިގެން، ޝެއިޚް އިލިޔާސް އާއި އެތައް ބައެއްގެ އަބުރު ކަތިލުމަށް ހިންގި މިބޮޑު ޖަރީމާ މިވަނީ މާތްﷲ ގެ ހެޔޮ ރަޙުމަތްފުޅުން ފަޅާއަރާފައެވެ.

ދިވެހިރާއްޖޭގެ ކޯޓުތަކުގެ ޤާނޫނާއި ޚިލާފަށް، ހައިކޯޓުގެ ބެންޗަށް ބަދަލު ގެނެސް، ޝަރުއީ އެއްވެސް އުޞޫލެއްގެ މައްޗަށް ބިނާވުމެއްނެތް ގޮތެއްގައި އެ ބެންޗުން އިމިގްރޭޝަން ގެ މައްޗަށް ނެރެފައިވާ އަމުރު މިވަނީ ބާތިލްވެގެން ގޮސްފައެވެ. މި އަމުރަކީ މީގެ ކުރީން ދަށުކޯޓުން ނެރެފައިވާ އަމުރު ބާތިލްކުރުމަށް އެބަޔަކު ކުޅަ މަސައްކަތުގައި، ކާމިޔާބީ ނުލިބޭނެކަމަށް ހީކުރެވުމުން، ހައިކޯޓުގެ ބެންޗަށް ބަދަލު ގެނެސްގެން، ދަށުކޯޓުގެ އަމުރާ ދިމާ އިދިކޮޅަށް ނެރެފައިވާ އަމުރެކެވެ. އިލްޔާސް ވިދާޅުވާ ގޮތުގައި މިޖަރީމާ ހިންގުމުގެ މުގުލުގައި ހުންނެވީ އޭސީސީގެ ގާނޫނީ ލޯޔަރު އަދި  މިހާރު އެޓޯނީ ޖެނެރަލް އާޒިމާ ޝުކޫރުއާއި މިހާރުގެ ހޯމް މިނިސްޓަރު ޖަމީލުއެވެ.

ހަމަ ޔަޤީނުންވެސް ސުޕްރީމްކޯޓުގެ މެންޑާމަސް އިން އެނގޭ ގޮތުގައި ޤައުމުގެ އަދްލު އިންސާފު ޤާއިމްކުރުމުގެ 2 ވަނަ ބާރުކަމުގައިވާ ހައިކޯޓުން މިވަނީ ޤާނޫނާއި ޚިލާފް އަމަލެއް ހިންގާފައެވެ. މިއީ އެއްވެސް ޙާލެއްގައި އާދައިގެ ކުޑަކުޑަކަމެއްނޫނެވެ.

ހައިކޯޓުން އިއްޒަތްތެރި ފަނޑިޔާރުންގެ ބަޔަކު އަމިއްލައަށް ޤާނޫނާއި ޚިލާފްވެފައިވާކަން ކިތަންމެހާ ރަނގަޅަކަށްވެސް ދޭހަވެގެން ހިނގައްޖެއެވެ. އެކަމަކު މިކަމުގައި ފޮރުވިފައިވާ އެންމެ ބޮޑު އެއް ސިއްރަކީ، އެ އިއްޒަތްތެރި ފަނޑިޔާރުންނަށް ޤާނޫނާއި ޚިލާފަށް އަމަލުކުޅައުމަށް އެންގީ ނުވަތަ މަޖުބޫރުކުރުވީ ކޮންފަރާތެއްކަމެވެ. ހަމަ ޔަޤީނުންވެސް އެބަޔަކު ހޯދާ އެބަޔަކާމެދު އިންސާފުވެރިކަމާއެކު ފައިސަލާ ކުރުމަކީ، ޤައުމުގެ އަދްލު އިންސާފު ޤާއިމްކުރުމުގެ ބާރުގެ މައްޗަށް ރައްޔިތުންގެ އިތުބާރު ހޯދާ ލިބިގަތުމަށް އޮތް ވަރަށް ބޭނުންތެރި މުހިއްމުކަމެކެވެ. އެހެނީ އަދްލު އިންސާފު ޤާއިމްކުރުމުގެ ބާރުގެ މައްޗަށް ނުފޫޒު ފޯރުވާ އަދި ކޯޓުތަކުގެ މިނިވަންކަމާއި މުސްތަޤިއްލުކަން ކިލަނބުކޮށްލުމަށް މަސައްކަތްކުރުމަކީ ގޭންގު ހަދައިގެން ނިކުމެ މީހުން މެރުމަށްވުރެވެސް ނުރައްކާތެރި ޖަރީމާއެއްކަން ޔަޤީން ކަށަވަރެވެ.

ކޮންމެއަކަސް ސުޕްރީމްކޯޓުގެ މެންޑާމަސްއާއެކު ހައިކޯޓުން މިމައްސަލަ އިންސާފުވެރިކަމާއެކު ތަހުޤީޤްކޮށް، އިންސާފުވެރި ފައިސަލާއެއް އިއްވާނެ ދުވަހަކަށް އެތައް ބަޔަކު ގެންދަނީ އިންތިޒާރުކުރަމުންނެވެ.

ސުޕްރީމްކޯޓުގެ މެންޑާމަސް

http://www.supremecourt.gov.mv/media/documents/533.pdf