ކިންގް ސްޕީޗްގެ ފޯސްޓަރ
މުނިފޫހިފިލުވުމުގެ ދާއިރާގައި ދެވޭ އެންމެ ޝަރަފްވެރި އެވޯޑް ކަމުގައިވާ އޮސްކާ އެވޯޑްސްގެ އެންމެ މޮޅު ފިލްމުގެ މަގާމު “ދަ ކިންގްސް ސްޕީޗް” އަށް ލިބިއްޖެއެވެ.
ސޯޝަލް ނެޓްވޯކްގެ އިތުރުން އިންސެޕްޝަން، ދަ ފައިޓަރ، އަދި ބްލެކް ސްވޯން ފަދަ މޮޅު ފިލްމު ތަކާއި ވާދަކޮށް ދަ ކިންގްސް ސްޕީޗް ހޮވިފައިވަނީ މިދިޔަ އާދިއްތަ ދުވަހު ބޭއްވި ހަފްލާއެއްގައެވެ. 83 ވަނަ އެކަޑެމީ އެވޯޑްސް ގެ އެންމެ މޮޅު ފިލްމަކަށް ޓޮމް ހޫޕާ ޑައިރެކްޓްކޮށްފައިވާ ދަ ކިންގްސް ސްޕީޗްއަކީ އިގިރޭސިވިލާތުގެ ރަސްކަމުގައި ހުންނެވި އެޑްވާޑް8 އޭނާގެ ރަސްކަން ދޫކޮށްލުމުން ކޮއްކޮ ޖޯޖް6 (ކްއީން އެލިޒަބަތު 2 ގެ ބައްޕަ) ރަސްކަމާ ހަވާލުވެ، ދިމާވާ ކަންތައްތަކުގެ މައްޗަށް އަލިއަޅުވާލާ ހަދާފައިވާ ފިލްމެކެވެ. މިފިލްމު ޑައިރެކްޓްކުރި ޓޮމްހޫޕާ އެންމެ މޮޅު ޑައިރެކްޓަރަކަށް ހޮވުނު އިރު ފިލްމުގެ ލީޑްރޯލްގައި ޖޯޖްގެ ބައި ކުޅުނު ކޮލިން ފާރތު ވަނީ އެންމެ މޮޅު ލީޑިންއެކްޓަރގެ މަގާމް ހޯދާފައެވެ. މީގެ އިތުރުން އެންމެ މޮޅު އޮރިގިނަލް ސްކްރީން ޕްލޭވެސް ލިބުނީ މިފިލްމަށެވެ.
